Shkruan: Ilmi REXHEPI

Më 9 maj 2010, faqja dy dhe faqja tre e gazetës ‘’Koha Ditore’’ përmbanin deklarata që rrezatonin dy mendësi dhe përmbanin dy zotime të kundërta me njëra- tjetrën skajmërisht. Ndërsa në faqen tre presidenti i Republikës së Kosovës, Fatmir Sejdiu, theksonte detyrën shtetërore dhe zotohej se askush s’do të jetë mbi ligjin, në faqen dy, zyrtarë arsimi klasifikonin ligjin në të pranuar dhe në të papranuar për ta dhe me këmbëngulje zotoheshin se sipas këtyre bindjeve klasifuese për ligjin do të vepronin në institucionet arsimore publike që drejtonin dhe që vazhdojnë t’i drejtojnë megjithë deklaratat antiligjore publike që kanë dhënë.

Agim Berisha, drejtor I Drejrorisë së Arsimit të Ferizajt zotohej se nuk do të zbatonte vendimet e gjykatave të qarkut sepse thjesht ditka kush punon në to dhe ditka kush na qenkan ata! A thua e kanë lexuar prokurorët këtë deklaratë të drejtorit Berisha, i cili zotohet publikisht se institucioni që drejton ai nuk do të zbatonte vendimin e gjykatës dhe me këtë sjellje demonstron dhe nxit mendësi kundërligjore?

Nehat Mustafa, këshilltar në Ministrinë e Arsimit (që këshillon për klasifim të ligjit dhe që premton ndërrim ligjesh në favor të orientimeve ’proletare’ të shokëve të tij!) faktin që Gjykata e Qarkut e Gjilanit ka marrë vendim që nxënësja me shami nga Vitia të kthehet në shkollë, e interpreton si kontest ndërmjet gjykatës dhe Drejtorisë së Arsimit të Vitisë! Pra, në këtë Kosovën demokratike dhe proevropiane , në ministri të saj, madje në Ministri të Arsimit , paska këshilltar që vendimet e gjykatave I quan konteste mes gjykatave dhe subjekteve në disfavor të të cilave janë marrë ato vendime. Të burgosurit, sipas këshilltarit në Ministrinë e Arsimit, qenkan jo më keq se persona që thjesht kanë konteste me gjykata dhe pritet të ndërhyjë dikush tjetër t’ua zgjidhë kontestet.

Këshilltari Mustafa nuk mjaftohet me këtë deklaratë kundërligjore, por premton edhe se, paragrafin 13 të nenit 4 me të cilin është ndaluar që nxënësëve t’u pengohet bartja e uniformës fetare, ta ndryshojë në të kundërtën e kuptimit që ka, pra në vend se të ndalohet pengesa e uniformës fetare siç shkruan në Udhëzimin Administrativ të Ministrisë, të ndalohet vetë uniforma, duke u arsyetuar se këtë e paskan pasur për qëllim që në krye të herës, por u qenkësh përvjedhur një gabim ‘teknik’ që, sipas tij , do të përmirësohet javën që vjen. Sa thjesht dhe sa shpejt e lehtë!

Udhëzimet administrative qenkan lojë sipas këshilltarit, paska të drejtë Ministria që një paragraf ta kthejë në kuptim krejt të kundërt me arsyetimin se herën e parë u është përvjedhur gabim ‘teknik’ dhe kjo pasi gjykata ka marrë vendim mbështetur në të. Kuptimi i kundërt sillet-gabimi teknik përmirësohet dhe kurrgjë kurrkujt!

A mundet vërtet që Ministria e Arsimit të marrë përsipër të ndryshojë krejt në kuptim të kundërt një paragraf të Udhëzimit Administrativ me arsyetimin se është përvjedhur gabim teknik( ndryshim që nuk është ligjor) e me qëllim që të ofrojë argument në favor të drejtorëve të arsimit që kanë ‘konteste ‘ me vendimet e gjykatave e të cilëve u është tekur të largojnë nxënëse nga shkolla vetëm e vetëm pse ato e quajnë flokun e vet pjesë intimiteti, bindje kjo që e kanë konform fesë së cilës i takon shumica absolute e vendit, zyrtarë të institucioneve të të cilit vend janë drejtori Berisha dhe këshilltari Mustafa?

0 komente · 80 herë është lexuar ·